Vardar Fans
Полека на црвено-црните колективи им завршуваат летните одмори, дел веќе се активни дел наскоро ќе почнат со тренинзи. Кугларскиот колектив за околу две недели од денес ќе почне со подготовки за новата сезона. Тренерот на Вардар, Драги Димитровски ќе почне со подготовката на сениорскиот и јуниорскиот тим за есенските предизвици.
Ростерот од лани е делумно изменет, заминаа двајца момци, а тимот се засили со едно ново име. Лидерот и најдобриот поединец Димитар Димитровски замина во Хрватска, а тимот го напушти и Младен Донковски. Тој се врати во екипата од каде што претходно премина кај нас, тимот на КК Империал Тобако ТКС. Ново име во идната сезона е Тони Тодоровски кој во нашите редови премина од екипата на КК 18-ти Август, станува збор за искусен куглар со долг стаж во македонското куглање. Прв предизвик оваа есен е вардаровиот турнир кој се организира по повод денот на независноста на Република Македонија. Станува збор за силен меѓународен кугларски турнир “8-ми Септември”. На него покрај нашиот Вардар, македонскиот вицепрвак и Куп шампион, ќе има уште три учесници, силни екипи од Ех-Ју републиките. Од Хрватска ќе биде учесник екипата на Медвешчак од Загреб, од Босна и Херцеговина доаѓа вицепрвакот на земјата, екипата на КК Ревита-Бања Лука а од соседна Република Србија учесник е КК Београд, тој тим е шампион во силната српска кугларска лига за изминатата сезона. Дуелите ќе се играат на 9-ти септември со почеток во 10-00 часот. Турнирот ќе се игра во кугларницата при Спортскиот центар “Борис Трајковски“ во Скопје.
