Интернационалец од Гана, Мустафа Куајнор е ново засилување за ФК Вардар

После Итало, фудбалскиот клуб Вардар го обелодени официјално и трансферот на уште еден играч. Се работи за интернационале од Гана, Мустафа Куајнор кој има 22 години и настапува на средината на теренот. Со него е потпишан договор на две години, со можност истиот да биде продолжен на уште една сезона.Во својата кариера има настапувано за Адуана Старс од Гана, потоа од каде оди во Кипар и игра за АЕЛ Лимасол, Алки Ларнака и Ермис Арадипу. Последната година играше во Австралија во екипата на Паское Вале. За официјалниот сајт на клубот, новото засилување го изјави следново:

-Среќен сум и задоволен што потпишав за Вардар. Драго ми е што станав дел од оваа екипа и со нетрпение чекам да заиграм за екипата. Ова за мене е голем предизвик што ќе настапувам во дресот на оваа екипа која е најдобра и најтрофејна во Македонија. Дoјдов во тим кој што секоја сезона се бори за титулата и се надевам дека заедно ќе успееме да ги исполниме амбициите на клубот“, рече новиот играч од средниот ред на шампионот.

Во еден ден нашиот шампион потпиша договор со двајца нови играчи, со што станува јасна намерата на клубот да ги направи сите напори да го помине Фенербахче и да се пласира во групната фаза од Лигата на Европа. Им посакуваме многу среќа на двајцата нови играчи во црвено-црниот дрес.