Бојан Тимевски: Искуството и поголемата желба пресудија за победата против Работнички

Втора првенствена победа за младинците на ФК Вардар на стартот од новата сезона. Во градското младинско дерби бевме подобри од екипата на Работнички со резултат од 4:2. Вардар прв поведе и со резултат од 1:0 се замина на полувреме. Во вториот дел противникот направи комлетен пресврт и поведе со 1:2, за во последните десет минути од натпреварот Вардар да има фуриозен финиш и да постигне дури три голови во мрежата на Работнички. За впечатоците од овој натпревар можете да прочитате од изјавата на Бојан Тимевски, кој за нашиот сајт го изјави следново:

-Како за едно дерби помеѓу две силни екипи, мислам дека бевме подобриот противник на теренот. Беше тоа тежок натпревар, како и што очекувавме, бевме свесни дека треба да дадеме се од себе за да стигнеме до трите бодови. Моравме да држиме висока концентрација во текот на сите 90 минути, иако имавме падови во одреден дел од мечот кога му дозволивме на Работнички да постигне два гола и да поведе со 1:2. 

Вардар се враќаше од негатива и со головите на Маркоски, Тодороски и Антовски успеаа на крај да слават и да освојат нови бодови. Претходно за водство од 1:0 отвори Бојан Колевски.

-Мислам дека значајно за пресвртот беше искуството и поголемата желба да се победи противникот. Иако до 80 минута имавме негатива и изгледаше дека гостинската екипа е поблиску до бодовите, сепак натпреварот доби поинаков тек и голот на Маркоски не врати во живот и ни влева надеж дека можеме да стигнеме до победа. Напаѓавме длабоко на половината на Работнички, за разлика од нив кои целосно беа орентирани на дефанзива. Се случи тоа што очекувавме, постигнавме уште два погодоци и успеавме да славиме во градското дерби.

Во следното коло, нашите младинци гостуваат во Тетово, на екипата на Шкендија. Добриот старт на сезоната за Вардар најавува дека и во Тетово ќе гледаме неизвесен меч.

-Мораме да бидеме задоволни од стартот на сезоната, имаме максимални шест освоени бодови од првите две кола, што е добра увертира пред следниот натпревар а тоа е гостувањето во Тетово. Добро се познаваме со Шкендија, мислам дека се во мала предност поради домашниот терен, но и ние имаме наши адути кои ќе се обидеме да ги искористиме и да дојдеме до поволен резултат.

Звонко Ивановски