Кондициониот тренер на ФК Вардар говори за подготвеноста на играчите

Фудбалерите на ФК Вардар по паузата повторно влегуваат во натпреварувачки ритам, црвено – црните момци беа на заслужен одмор од 20-сетина дена. Веќе играчите тренираат напорно, имаат по два тренинга дневно, а за нивната физичка подготвеност говори кондициониот тренер на екипата Михајло Костиќ. Ви ја пренесуваме изјавата на Михајло Костиќ за fkvardar.mk

„Сега засега во принцип сите работат добро и максимално професионално ги одработуваат поставените задачи. На новите играчи кои ни се приклучија малку подоцна и имаа кратки паузи во нивните кариери, ќе им биде потребно одредено време додека да се прилагодат на ова темпо, но искрено се надеваме дека набргу и тие ќе влезат во потребниот ритам. Во секој случај, задоволни сме од тоа како се одвиваат работите во овој воведен дел од подготовките и мислам дека успеавме да изградиме една добра основа за она што нѐ очекува понатаму. Низ контролните натпревари во Анталија ќе се потрудиме дополнително да ја подигнеме натпреварувачката форма кај играчите. Доколку продолжат вака да работат, уверен сум дека ќе бидат и повеќе од подготвени до почетокот на првенствените натпревари од пролетната полусезона“, изјави Костиќ.