Vardar Fans
Вардаровата генерација родени “2008„ тргна фуриозно на турнирот “Кул Куп 2018„ откако утрово им одржаа лекција на своите врсници од екипата на Локомотив Пловдив од Бугарија. Без поголеми проблеми и со целосна доминација на теренот, избраниците на Миле Крстев го “прегазија„ противникот и го совладаа убедливо со резултат од 7:0.
Уште во првите минути од дуелот го отворивме резултатот, кога Арти Азизи погоди за водство од 1:о. На голот претходеше удар на капитенот Дамјаноски, кој противничкиот голман не успеа да го скроти, односно ја испушти топката од рацете, која стигна до Азизи на кој не му беше тешко да ја вметне во мрежата.
Црвено-црните речиси и да не му дозволија на противникот да ја помине својата половина, во одбраната командуваа Кесиќ, Ташовски и Бојковски, додека на средината на теренот главен за организирање акции беше Ненад Дамјаноски, а Азизи и денес се покажа како врвен голгетер, додека најмладиот Лука Трпевски повторно воодушевуваше со својата брзина и потези на теренот.
Се редеа ударите кон голот на Пловдив, а во прилики се најдоа Азизи и Бранковски, но голманот на бугарите успешно одбрани. Стигна и предност од 2:0, откако погоди Лука Трпевски и го зголеми резултатот.
Тренерот Миле Крстев им даваше подеднаква минутажа на сите играчи кои му беа на располагање. Обиди во продолжение имаа и играчите задолжени за одбрана, кои често знаат да се уфрлат во нападот, тоа се Бојковски и Ташовски, чии удари завршија покрај голот. Следните два гола на натпреварот ги постигна Стефан Бранковски, најпрво зголеми на 3:0, за истиот играч по една голема грешка на голманот кој промаши вратена топка до него, Бранковски сам се најде пред противничкиот гол и погоди за 4:0.
Избраниците на Крстев не помислија да застанат, напротив беа желни за уште поголема победа, а тоа им успеа во целост. Најубавиот гол на овој дуел го постигна дефинитивно Арти Азизи, кој со освртување биеше силно во горниот агол од голот на Пловдив, за зголемување на водството на 5:0. Истио играч до крајот на мечот беше стрелец на уште два нови гола, вкупно четири за Арти на овој натпревар, за поставување на конечните 7:0 на овој натпревар.
Во текот на утрешниот ден ќе ги одиграме останатите два натпревари од групната фаза, противници ни се екипите на Лидер Лесковац и Тефејуз.
