Vardar Fans
На сите деца ќе им биде дадена шанса да го докажат својот фудбалски талент, и еден ден да го исполнат својот сон – да бидат фудбалери на Вардар и на репрезентацијата. Со нив ќе работат стручни тренери кои што ќе ги воведат децата кон фудбалските вештини, но и кон сите процеси надвор од терените кои ќе придонесат да станат добри фудбалери, но во исто време и добри личности. Од црвено-црниот фудбалски колектив ветуваат одлична и предана работа со младите “регрути“ во Академијата, за кои подготвиле посебна програма. Исто така тие го потенцираат и следново:
Целта во работата со почетниците е од перспективен карактер – вистинскиот резултат на тренерот, покрај трофеи и медали, е што поголем број играчи кои се подготвени за сениорскиот тим или националната селекција. Нашите тренери ја прилагодуваат работата во склад со биолошкиот развој и го следат природното развивање на почетниците, затоа што тренажниот процес спротивен на логиката за природно развивање може да остави негативни последици за вкупното напредување на почетниците. Во нашата програма се вклучени и теоретски предавања на кои особено им обрнуваме внимание, а истите се одржуваат во специјално опремените предавални кои се дел од современата инфраструктура на Фудбалската Академија. Со нетрпение ги очекуваме новите надежи на ФК Вардар на првиот тренинг на 1-ви септември.
