Бронза вредна злато, Македонската кадетска селекција обезбеди пласман во првата дивизија

Нашите репрезентативци до 16 години, предводени од селекторот Александар Јованчев, го освоија третото место на Европското првенство за кошаркари до 16 години, дивизија Б со што се пласираа во дивизија А. Со резултат од 84-66 совладана беше соодветната репрезентација на Чешка.

 Нашите надежи играа егал-меч со Чесите 20 минути, но потоа следеа експлозивни десет минути, во кои се направи серија од 16-0 и противникот беше апсолутно надигран. Во третиот квартал од мечот, Македонија постигна 30 поени и прими само 14, со што се одлепи резултатски на 69-49 и мирно го трасираше патот до триумфот. Вардарецот, Мартин Величковски на овој натпревар постигна  7 поени, имаше 5 скока и 3 ассистенции. Тој на овој историски натпревар одигра 19:38. минути.

Избраниците на селекторот Јованчев се првата македонска селекција во младинските категории која по долги 12 години пауза влезе во повисок ранг. Последен пат досега тоа го направи генерацијата на Самарџиски и браќата Стојановски во 2006 година, како младинци.