Репрезентацијата на Хрватска стигна и до втората победа во подготвителниот период. После триумфот над Унгарија, момците на Червар излегоа како победници и во дуелот со Европскиот Шампион, тоа е Шпанија. На овој натпревар во составот на Хрватска беше Иван Чупиќ кој имаше свој придонес во триумфот.
Освен во првите пет минути од натпреварот кога Шпанија беше во водство од 1:3, во продолжение од дуелот, Хрватска имаше предност и контрола на резултатот. На полувреме се замина со резултат 17:14. Во вториот дел само растеше позитивата во корист на „коцкастите“, најпрво беа во предност од 22:17, додека најголемата разлика беше при резултат 26:19. Речиси сите ракометари добија шанса за настап кај победничката селекција. На крајот конечниот резултат гласеше 31:28.
Поранешниот вардарец, Лука Циндриќ, беше најдобар стрелец со 5 постигнати голови, додека Иван Чупиќ го заврши мечот со 3 погодоци.