Македонија ремизираше против Италија, на вториот контролен меч одигран во Турција

Македонската ракометна репрезентација го одигра и вториот контролен натпревар во Турција. После вчерашниот триумф против домашната селекција, денес избраниците на Данило Брестовац ремизираа со репрезентацијата на Италија (26:26).

Во првото полувреме и двете репрезентации имаа свои периоди. На стартот Италија стигна до водство од три гола разлика, но како одминуваше првиот дел, Македонија играше се подобро, па во еден момент стигна и до предност. На полувреме се замина без водство на двете селекции, на семафорот по 30 минути игра стоеше резултат 12:12.

Во второто полувреме, Италија најпрво се одлепи на три гола разлика, а во 45 минута имаше и највисоки 22:17. Во тој момент, Брестовац побара тајмаут, по што започна добра серија на нашата селекција, која до крајот се погрижи да не биде поразена, односно натпреварот заврши со нерешен резултат 26:26.

Поранешниот вардаррец, Мартин Поповски беше најефикасен со 8 голови, додека од вардаровите ракометари, во листата на стрелци се запиша Димитар Димитриоски кој постигна 2 гола. На голот, Томовски имаше 10 одбрани, додека младиот Кизиќ една интервенција. Во стручниот штаб на репрезентацијата се наоѓа Александар Царчев.