Vardar Fans
Екипата на РК Вардар 1961 утре гостува во Кил, на натпревар од 9.коло во Лигата на Шампионите.
Вардарци имаат тешка мисија пред себе, да ја прекинат лошата серија од пет последователни порази, со оглед дека гостуваат кај еден од претедендите за освојување на Лигата на Шампионите. Кил веќе не победи на првиот одигран натпревар на двете екипи во С.Ц. Јане Сандански (26:29), па сигурно дека ќе сака да ги освои бодовите и пред своите навивачи.
Кил е подобар во меѓусебните дуели со Вардар во ЛШ, а последниот триумф на црвено-црните е во рамките на 1/4 финалето во 2018 година, кога за еден гол бевме подобри од противникот, со истава разлика загубивме на реваншот во Скопје, но поради поголемиот број на постигнати голови, тогаш по втор пат се пласиравме на завршниот турнир во Келн.
Вардар во минатото покажал дека може да се носи со германските екипи, а често знаел и да ги изненади на противничкиот терен. За избраниците на Веселин Вујовиќ е неопходна победа на овој натпревар, за враќање на самодовербата во тимот. Сепак, напоменавме дека ќе биде многу тешко да се победи Кил на неговиот терен, екипа која после осум одиграни кола, има скор од пет победи, еден нерешен резултат и два порази. Останува да видиме и со каков состав ќе отпатуваме на гостувањето во Германија, и дали во екипата ќе се вратат Диало и Ристовски.
Натпреварот утре ќе започне од 20:45 часот.
