Висока победа за кадетите на РК Вардар, на натпревар против екипата на Скопје

Кадетите на РК Вардар стигнаа до убедлива победа, на натпревар од 16.коло во групата А на кадетската лига. Избраниците на Зоран Петковски успеаа да слават висока победа на дуел против екипата на РК Скопје со резултат 42:27.

Екипата на Скопје го отвори резултатот, но вардарци вратија со серија од три последователни голови и зголемија на 3:1. Во текот на целото прво полувреме, Вардар имаше постојано предност, која во еден момент достигна и пет гола разлика. Последното израмнување беше при резултат 3:3, за ние да направиме нова серија и да поведеме со 7:4. Се играше брзо, темпо на кое подобро реагираа избраниците на Зоран Петковски. Екипата на Скопје во првиот дел одржуваше резултатска неизвесност и не дозволи некако Вардар се одлепи на голема разлика, иако во еден момент беше 16:11, сепак на полувреме се замина само со три гола предност за нашиот состав, резултатот по 30 минути игра гласеше 17:14.

Во вториот дел, Скопје немаше сила да парира на вардаровите кадети, кои отворија со два гола во серија и ги вратија оние највисоки пет гола позитива од првото полувреме. Како одминуваше натпреварот, постепено растеше разликата во корист на вардарци, кои во 40 минута имаа и предност од 27:20. Избраниците на Будимир не успеаа да се вратат во игра, а залетаниот Вардар поведе и со двоцифрена разлика, кога резултатот на семафорот во спортската сала „Круме Кепески“ гласеше 33:23. Петковски им даде шанса на сите играчи кои беа на располагање за овој натпревар, остатокот од натпреварот беше само рутина, а единствена дилема беше каков ќе биде конечниот резултат. На крајот испадна и многу висока победа, изразена со 15 гола разлика, или конечни 42:27 во корист на Вардар.

Најефикасен на натпреварот беше Петар Илиевски со 10 постигнати голови, додека кај Вардар во листата на стрелци се запишуваа уште и Томислав Стаменков и Ангел Столески со по 6 постигнати голови, Лука Најдовски имаше 5, Никола Жузелов, Матеј Тевдовски и Никола Нечовски додадоа по 4, додека по 1 гол беа дело на Виктор Ванчевски, Матеј Новаковски и Давид Саздовски.