Vardar Fans
Пионерите и младинците на РК Вардар се поразени на натпреварите кои ги играа изминатиов викенд.
Во салата „Круме Кепески“ како домаќини, вардаровите пионери загубија од екипата на Мулти Есенс. Конечниот резултат гласеше 16:23. Избраниците на Кирил Атанасовски добро го започнаа натпреварот кога поведоа со 2:0, додека последното израмнување на мечот беше при резултат 5:5, за до истекот на првите 20.минути, Мулти Есенс да направи серија од 1:5 и да поведе со 6:11.
Оваа разлика, противникот ја одржуваше цело второ полувреме, на моменти само вардарци намалуваа на четири гола разлика, но Мулти Есенс го контролираше натпреварот и на крајот стигна до триумф.
Во нашите редови се истакнаа Никола Атанасовски со 7 и Дамјан Најдовски со 5 гола.
Младинците беа високо поразени на гостувањето кај екипата на Еурофарм Пелистер 2. Натпреварот кој се одигра во Битола, заврши во корист на домашниот тим со резултат 38:21.
Само во првите пет минути се играше гол за гол кога резултатот беше израмнет на 3:3, за Еурофарм Пелистер да направи серија и да поведе со 6:3. Во 22.минута домашниот тим имаше и двоцифрена предност од 17:7, додека на полувреме се замина со резултат од 23:9.
Немаше неизвесност во вториот дел, домашниот тим стигна до висока победа.
