Гонзалез и Дибиров: Нерешениот резултат на крајот, можеби беше најреален исход

Вардар со нерешен резултат ја започна 2018 година, откако вечерва гостуваа на екипата на Брест Мешков. На секогаш незгодниот терен, имавме можност да победиме, но и да загубиме. На крајот можеби овој резултат беше најреален, иако имаше судиски одлуки на штета на Вардар, посебно во последната минута од натпреварот кога се решаваше победникот. На прес-конференцијата пред медиумите се обрати тренерот на Вардар, Раул Гонзалез кој го изјави следното:

Знаевме дека нема да биде лесно во Брест. Иако искусни, сепак имавме проблеми во нападот и одбраната, како во првото така и во второто полувреме. Резултатот беше израмнет во најголем дел од натпреварот и мислам дека можеме да бидеме задоволни со освоениот бод. Ние сме во добра позиција и мора да продолжиме со овој ритам.

Дибиров беше наш најефикасен играч, успевајќи да постигне дури осум голови.

-Вечерва имаше неверојатна атмосфера на трибините. Според мое мислење добар натпревар, сакавме да одигра и подобро отколку што прикажавме денес на теренот. Противникот успеа да ја забави играта. Сметам дека нерешениот резултат е реален исход и сакам да му честитам на Брест Мешков за освоениот бод.