Двете екипи на ФК Вардар генер. “2008“ постигнаа 22 гола во денешното коло од детската лига

Две убедливи победи за генерацијата “2008“ на ФК Вардар во заостанатото коло од детската лига. Денес на терените на ФК Работнички нашите млади надежи ги победија екипите на Форца (2) и Њу Старс (2).

Најпрво на теренот излегоа екипите на Вардар (1) и Форца (2). Овој меч го добивме со резултат 9:1. Во првите десет минути од натпреварот двете екипи создадоа шанси, кои останаа без реализција. Голеадата во мрежата на Форца ја започна нововлезениот Марко Марјановски кој постигна дури четири последователни голови. Ова момче внесе живост во играта на Вардар, кој секогаш се наоѓаше на вистинското место и секогаш погодуваше во мрежата на Форца за предност од 4:0.

Продолжи добрата игра на црвено-црните која до крајот на првото полувреме беше крунисана со уште еден гол и тоа Павел Андов, за веќе водство од 5:0. За одбележување во првото полувреме е одбранетиот пенал на нашиот голман, Милошоски, кој одлично бранеше на овој меч. По првиот дел резултатот беше 5:0.

Во вториот дел екипата на Форца успеа да постигне гол и да го намали резултатот на 5:1, по грешка на нашиот голман кој неприцизно додаде една топка, која стигна до противничкиот играч кој немаше проблеми да ја смести во мрежата, за намалување на резултатот на 5:1. Веднаш се обиде да врати Андов, но голманот на Форца го одбрани ударот. Сепак истиов играч успеа да погоди, откако беше нафрлена топка од корнер, која стигна до Андов, кој не му беше тешко да ја вметне во голот, за предност од 6:1. Марјановски се најде во нова прилика, но овој пат противничкиот голман го брани неговиот удар. Прв гол на денешниот натпревар постигна и Горазд Филиповски за водство од 7:1, а во листата на стрелци се запиша и Петар Јаковлевски и тоа со удар од белата точка, за 8:1. Натпреварот заврши со хет-три на Павел Андов, кој го постави конечниот резултат од 9:1.

Уште поубедлив беше Вардар (2) кој славеше во дуелот со Њу Старс (2). Резултатот на овој меч гласеше 13:2 во корист на Вардарци. Самиот резултат говори за случувањата на теренот. Доминација за избраниците на Неделковски, кои до врв ја наполнија мрежата на Њу Старс. Стрелци на головите беа Ненад Дамјаноски (4), Матеј Киш (3), Арти Азизи (3), Стефан Бранковски (2) и Стефан Марковски.