Фудбалската Академија на ФК Вардар изгледа феноменално!

За големиот христијански празник Велигден дечињата од фудбалскиот клуб Вардар добија екстра модерен тренинг центар за подготовки, натпревари и сите други активности пред и за време на натпревар по најнови светски стандарди. Оваа академија треба да биде патоказ каде што ќе се развиваат новите Вардарови легенди како Панчев, Димитровски, Дончевски и тн. ФК Вардар на својата веб страна го напиша следното:

Голема чест ни е да Ве информираме, дека институција од овој тип се гради за прв пат во историјата на Република Македонија и ќе биде локален и регионален лидер во креирањето на нови фудбалски надежи. Од компаративен аспект би сакале да потенцираме дека најблиску во регионот академија од ваков тип има фудбалскиот клуб Партизан, кој реално продуцира фудбалски таленти и е дел од еминентните фудбалски натпреварувања како Лигата на Европа и групната фаза на Лигата на шампиони.

“Објектот е проектиран од Балкан Груп Констракшн. Се работи за модерен дизајн во елипсовидна форма, согласно со просторот и во насока на визуелна адаптација со Националната Арена Филип Втори. Фудбалската академија ФК Вардар е со површина од 1152m2 во кој се сместени 6 соблекувални за децата и тренерите, простор за видео презентации, администатиен простор и други помошни простории. Сите останати простории се опремени централна вентилација со греење и ладење, како и со подно греење. Обезбедени се 50-тина паркинг места, за потребите на објектот. Објектот е осветлен со лед светилки, кои навечер даваат посебен ефект и амбиент. Во екстериерот и ентериерот на објектот доминираат црвената и црната боја и амблемите како симбол на ФК Вардар” изјави Марио Кофилоски директор на Фудбалската академија ФК Вардар на денешната презентација на овој објект кој е од есенцијална важност за развојот на фудбалот како спорт во Македонија.

Денес во ФК Вардар професионално тренираат 400 млади деца, додека дел од фудбалската академијата се вкупно 1000 дечиња. Со реализацијата на оваа институција поттикнавме голем интерес кај јавноста и го подигнавме нивото на репутација од аспект на високи стандарди во едукација и напредок на фудбалери од најмладите категории како стартна основа за изградба на идни врвни поединци од светски калибар.

“Терените се со вештачка трева поради можноста тренинзите да се одвиваат во разни временски услови. Сите услови што ги нуди академијата се одговараат со високите стандарди на професионалните клубови од светски ранг. Слободно можам да кажам дека академијата на ФК Вардар ги исполнува сите услови за создавање на врвни фудбалери кои во иднина ќе ги гледаме во некои големи европски клубови. “ – изјави Павел Неделковски координатор на детската школа ФК Вардар.

   Фото: fkvardar.mk