Христов во Букурешт со поддршка за македонската фудбалска репрезентација

Директорот на Академијата на ФК Вардар, Ѓорѓи Христов се наоѓа во Букурешт, каде утре ќе ја бодри Македонската репрезентација која ќе дебитира на ЕП. Христов е во друштво на своите синови, Доротеј и Миха кои тренираат во Вардар.

Христов е познато име во македонскиот фудбал, како и поранешен репрезентативец на Македонија. Горд е што оваа генерација успеала да го исполни сонот на целиот народ.

„Ова е исполнување на сонот на сите генерации, не само на играчите туку и на фановите, а тој се исполни по 30 години. Специјално е чувството да дојдеш на Европско првенство и да ја бодриш својата земја. Оваа генерација ни даде можност да го следиме тимот на голем собир. Да се биде меѓу 24-те најдобри тимови во Европа значи дека имаш класа и квалитет, мислам дека имаме шанси за следна фаза, изјави Христов за УЕФА.