На Вардар му останува да ја спаси честа на македонските екипи, во квалификациите од ЛЕ

Овие денови актуелни се натпреварите во 1.квалификациско коло од Лигата на Европа. Лош ден имаа вчера македонските тимови, кои се збогуваа од Европските натпреварувања, за оваа сезона. Екипите на Работнички и Шкупи, не успеаа да ја поминат првата елиминациска пречка, па останува на Вардар да ја спаси честа на македонските тимови во ЛЕ.

Иако имаа предност од првиот дуел одигран во Скопје (2:1), екипата на Работнички вчера разочара на реваншот во Унгарија и убедливо го загуби дуелот со Хонвед (4:0). Уште по првото полувреме, унгарците ја анулираа негативата, кога на одмор заминаа со водство од 2:0. Ниту Шкупи не успеа да се пласира во следното квалификациско коло, откако не успеа да ги надокнади двата гола негатива од првиот меч одигран во Шкотска, кога загуби со 2:0. Вчера на реваншот кој се одигра на арената “Филип Втори“ тимот на Глазгов Ренџерс кој е предводен од Стивен Жерард, одигра без голови против Шкупи, што им беше доволно за пласман во 2. квалификациско коло.

На Вардар останува да ја спаси честа на македонските клубови и да биде едниствениот кој ќе продолжи со настапите во Лигата на Европа. За да случи тоа треба утре вечер на арената “Филип Втори“ да ја анулираме негативата од 1:0, која ја имаме после првиот одигран дуел во Ерменија, против тимот на Пјуник. Се надеваме на многу подобра игра на црвено-црните, кои треба да докажат дека се поквалитетни од противникот.