Гуџуфи погоди за Македонија У17, настап во дуелот со Црна Гора забележаа и Стојановски, Љушев, Ибраим и Милошевски

Македонската фудбалска репрезентација до 17 години одигра со нерешен резултат (2:2) на првиот контролен натпревар против соодветната селекција на Црна Гора.

Денес се одигра првиот дуел на овие две репрезентации во Подгорица, кој заврши без победник. Стрелец на еден од головите за Македонија беше напаѓачот на Вардар, Бесар Гуџуфи, кој погоди од белата точка. Стрелец на другиот гол беше исто така поранешен играч на Вардар, се работи за Матео Софијаноски.

Во стартниот состав на селекторот Канатларовски од вардаровите играчи се најде само Георг Стојановски кој на теренот помина 80 минути. Во игра на натпреварот влегоа уште и Гуџуфи, потоа Максим Милошевски, Давид Љушев и Левент Ибраим, додека единствено шанса не доби голманот Наум Ангелов.

Вториот дуел на овие репрезентации ќе се одигра во четврток (5.ноември), исто така во Подгорица.