Vardar Fans
Пионерите на ФК Вардар одиграа одличен контролен дуел со тимот на штипска ФК Брелница, денес на теренот на тренинг центарот на црвено-црните. Оваа средба која изобилуваше со одличен фудбал, во кој ние доминиравме заврши со резултат 0-0.
Саше Божиноски стартуваше со: Иле Aпостоловски, Влатко Кулуковски, Александар Трајчевски, Матеј Mитревски, Зоран Фидановски, Лука Јакимовски, Максим Бундалески, Никола Уневски, Тино Спасиќ, Михаил Јаневски и Михаил Кузмановски.
Доминиравме на почетокот на оваа средба, имавме повеќе од играта и во воведната третина од првото полувреме имавме две прилики. Тино Спасиќ се закани во два наврати кон голот на Брегалница. Во првиот дел гостите имаа само една конкретна шанса кон голот на Апостоловски, ударот мина над гредата. Бундалески Максим се обиде со удар да донесе наша предност, сепак и по оваа шанса не се промени резултатот. Избраниците на Саше Божиноски имаа повеќе од играта, сепак фалеше завршниот потег за затресување на мрежата на штипјани. До крајот на првите 45.минути на овој контролен натпревар, црвено-црните пионери имаа уште една шанса, Кузмановски Михаил е последниот кој се закани кон голот на ривалот. На одмор помеѓу двата дела заминавме со почетниот резултат, 0-0.
Слично започна вториот дел, како и првиот ние имавме повеќе од играта, игравме повеќето од полувремето на нивната половина. Кулуковски Влатко беше првиот кој имаше обид да ја затресе мрежата на сино-белите. Потоа се редеа шанси, најпрвин Уневски упати удар кој голманот на Брегалница го исфрли со крајни напори во корна. Агрон Туша исто така упати удар кој беше одбранет и исфрлен во нова корна за нас, големиот број на изведени удари од аголот покажуваа дека црвено-црните се тимот кој доминира во поле на оваа средба. По една брза транзиција конечно на средината на вториот дел се закани нашиот противник, сепак Апостоловски беше на место и благовремено ја острани опасноста од пред својот гол.
Веднаш потоа имавме шанса да го казниме ова промашување на Брегалница, нивниот голман не му дозволи на Ристовски Стефан да донесе наша предност. Ние не престанавме да напаѓаме и во продолжението, се редеа акции пред противничкиот гол. Бундалески Максим изведе слободен удар кој заврши во „живиот ѕид“. Иако имавме голем број на шанси на оваа средба сепак истата заврши со почетниот резултат 0-0.
