Пионерските екипа на ФК Вардар во текот на вчерашниот ден ги одиграа првите контролни натпревари во подготвителниот период. Нашите екипи гостуваа на екипата на Македонија Ѓ.П, на теренот со вештачка трева во населбата Ѓорче.
Помладите пионери на Вардар иако имаа водство од 0:2, сепак на крајот го загубија натпреварот со резултат 4:2. Тренерот на оваа вардарова генерација, Трајче Стојковски, им даде шанса за настап на сите играчи, односно во двете полувремиња играше со различни постави. По првото полувреме имавме минимално водство со голот на Петар Давитов, кој погоди на асистенција од Радески. Во овој дел од мечот за одбележување е големата шанса на Златко Радески, овој пат успешно одбрани голманот на домашниот тим. На нашиот гол, Лука Јаневски, имаше две одбрани, додека на полувреме се замина со резултат 0:1.
На стартот на второто полувреме, Вардар поведе и со 0:2 преку Михаил Димов кој погоди на одбиена топка. Имаше пад во нашата игра, тоа целосно го искористи домашниот тим кој до крајот на натпреварот постигна четири голови и направи комплетен резултатски пресврт. На нашиот гол застана и Калин Дихсон, кој се истакна со две интервенции. Конечниот резултат на крајот гласеше 4:2 во корист на Македонија Ѓ.П.
Пораз за пионерите на првиот контролен натпревар во подготвителниот период. Екипата предводена од Марјан Герасимовски загуби од Македонија Ѓ.П. Конечниот резултат гласеше 5:3.
На полувреме резултатот беше нерешен 2:2, а домашниот тим прв успеа да го отвори резултатот на 1:0, но Вардар бргу врати со погодокот на Матеј Гаштаров за 1:1, а потоа да направи и резултатски пресврт со голот на Марко Николовски за 1:2 на асистенција од Лефковски. После нафрлена топка од прекин во нашиот шеснаесетник, еден од играчите на домашниот тим беше највисок во скокот и со глава донесе израмнување на 2:2. Со овој резултат се замина на полувреме. Нашиот голман, Андреј Данстак имаше и две добри одбрани во овој прв дел.
Лошо одигравме во вториот дел и му дозволивме на противникот да постигне три гола, за предност од 5:2, додека пред крајот поразот го ублажи Михаил Танчев, за конечни 5:3 на натпреварот.
На овој прв контролен натпревар, Вардар беше без репрезентативците, Величковски Алији, Ајетовиќ и Сековски, кои со репрезентацијата до 17 години беа на тренинг камп во Кичево кој траеше до денес.