Мартиновски со одличен резултат на Скопскиот маратон, се натпреваруваа уште шест Вардарци

Скопските улици во неделата беа место на кое се најдоа преку 10.000 тркачи, секој со своја приказна. Меѓу големиот број атлетичари секако и оваа година имаше претставници од АК Вардар.

Најзабележителен настап на Скопскиот маратон имаше Трпе Мартиновски. Искусниот Трпе маратонот од 42 километри го заврши на одличното 18 место со време од 3:12:11. Покрај Мартиновски, Вардар на 42 километри имаше уште еден натпреварувач, Дејан Петков маратонот го заврши на 171 место со време 4:51:27.

На 21 километар пак, Вардар имаше тројца свои претставници. За жал Петре Завировски и Ненад Диниќ не ја завршија трката, додека пак Васко Петрушевски заврши како 1064 пласиран со резултат 2:34:40.

Најкратката патека од 5 километри, Игор Димитровски ја истрча за 39:36 со што го завзема 1405 место, додека пак Невен Фидановски заврши како 760 со време 34:12.