Vardar Fans
Вечерва со почеток од 20:15 часот, Вардар ќе го одигра и претпоследниот натпревар од регуларниот дел во СЕХА-лигата. Црвено-црните гостуваат на екипата на Нексе.
Нексе оваа сезона е најпријатното изненадување во СЕХА-лигата и за прв пат ќе има можност да се најде на завршниот турнир и да се бори за трофејот во ова натпреварување. Тие од првата сезона се дел од СЕХА-лигата, но ниту еднаш не успеале да обезбедат учество на Ф4. Оваа сезона имаат 12 победи и 4 порази, што говори за квалитетот на хрватскиот вицешампион, а на добар пат се да обезбедат и пласман во најдобрите осум екипи, во ЕХФ купот, односно второто по ранг натпреварување после Лигата на Шампионите. Нашиот противник не може да се пофали со некој позитивен биланс во дуелите со Вардар. Ова ќе биде нивни 16-ти меѓусебен дуел во СЕХА-лигата, а Вардар ќе се обиде да стигне до 14 победа, додека Нексе само до вториот триумф во мечевите со Вардар, само еднаш натпреварот завршил со нерешен резултат. Единствениот триумф го имаат пред пет години, кога успеале на домашен терен да го совладаат нашиот шампион. Двајца играчи на Нексе се наоѓаат во ТОП-10 листата на најдобри стрелци, тоа се Јагањац, на кој му се вброени и головите кои ги имаше во дресот на Металург, како и Томи Возаб, а тука е и пикерот Марин Шипиќ.
И двете екипи имаат проблеми со повредени играчи, па сигурно е дека нема да ризикуваат, на натпревар кој нема големо резултатско значење, со оглед дека и Вардар и Нексе веќе се сигурни патници на завршниот турнир. Парондо ги остави во Скопје, Дисингер, Борозан, од подолго веќе е отсутен и Горбок, па повторно ќе биде проблем таа лева бековска позиција. Вардар го доби првиот дуел оваа сезона, одигран во Скопје, со резултат 31:26.
Директен преност од мечот можете да проследите на МРТ-1.
