Златко Хорват: Големо задоволство е да играш против Вардар, екипа која пред две години ја освои Лигата на Шампионите

Во сабота, Вардар гостува во Хрватска на екипата на ППД Загреб, во рамките на првиот осминафинален меч од Лигата на Шампионите. Црвено-црните ќе се обидат да да дојдат до позитивен резултат, пред реваншот за седум дена во Скопје. Во пресрет на утрешниот дуел, од противничкиот табор одржаа прес-конференција на која ги изнесоа очекувањата за мечот со Вардар. Пред медиумите се обрати капитенот, Златко Хорват кој го изјави следното:

-Драго ми е што интересот за натпреварот е голем и тоа што навивачите ќе ја исполнат арената. Мислам дека со игрите преку целата сезона го заслуживме пласманот во најдобрите 16 екипи. Стигнавме до посакуваното осминафинале и завршивме добра работа, а да се игра против екипа која пред две години ја освои Лигата на Шампионите е големо задоволство.

Хорват смета дека Вардар е фаворит за пласман во следната рунда, но капитенот на Загреб вети голема борба и на двата меча, со можност неговиот тим да изненади.

-Сигурно дека Вардар и оваа сезона е еден од претедентите за пласман на завршниот турнир. Сепак ние не сакаме да застанеме тука и да бидеме елиминирани во осминафиналето. На двата натпревари ќе дадеме се од себе и ќе се обидеме да поминеме во следната рунда. Нема да биде лесно, се работи за врвна екипа, но веќе повеќе пати покажавме дека можеме да играме против фаворити.