Vardar Fans
Вардар со висок триумф (39:30) ја заврши групната фаза во Лигата на Шампионите. Во С.Ц. Јане Сандански Вардар беше подобар противник од Елверум. Без разлика што натпреварот немаше резултатско значење за нас, црвено-црните дадоа се од себе да стигнат до позитивен резултат. Имавме проблеми во вториот дел од натпреварот кога имавме негатива од три гола, но сепак Вардар успеа да се издигне и на крајот да стигне до голема победа.
После завршување на натпреварот своите впечатоци пред медиумите ги сподели тренерот на екипата, Давид Дејвис кој го изјави следново:
-Сакам да им честитам на ривалите за добрата сезона, како и на моите играчи. Задоволен сум од трите победи во низа. Работиме навистина многу и добро, па среќен сум за тоа. Во првиот дел беше тешко бидејќи немаше резултатско значење. Сакав тимот да победи иако бевме сигурно петти. Јас бев лут за играта, но по паузата игравме многу подобро. Моравме да се адаптираме, ја сменивме одбраната при -3 и тоа беше добра одлука. Томовски беше одличен во завршницата и крилата пресекоа многу топки, сè беше добро за нас и се покажа желбата за победа. Ако сакаме да направиме нешто во ЛШ, не смееме да играме со ниска концентрација во било кој натпревар.
Многу сум задоволен бидејќи немавме многу изгубени топки. Кога пристигнав тука, нагласив дека не смееме да грешиме премногу. Задоволен сум од фактот дека денес погрешивме само трипати. Откако дојдов се смени системот и напредувавме бидејќи сите покажаа дека веруваат, истакна Дејвис.
Томовски беше одличен во второто полувреме, благодарение на неговите одбрани се случи пресвртот.
-Мислам дека отворивме добро, ама во тимот ја немаше нашата голманска поддршка. На полувремето се консолидиравме, едноставно моравме да дадеме максимум и тоа се виде. Благодарност до публиката, како и тимот бидејќи сите верувавме и во кризниот период. Оваа победа е од големо значење пред дуелот со Веспрем, изјави Томовски.
