Карачиќ: Нашата желба е да ги одбраниме трофеите во сите натпреварувања

Тројца играчи на Европскиот шампион од недела се наоѓаат на собир со репрезентацијата на Хрватска, во пресрет на ЕХФ неделата. Тоа се Игор Карачиќ, Лука Циндриќ и Иван Чупиќ кои беа повикани од селекторот, Лино Червар. Средниот бек на Вардар во интервју за хрватскиот весник, “Јутарњи лист“, зборуваше за настапите во Вардар и за собирот со репрезентацијата на Хрватска.

-Вардар игра во одлична форма, а она што го направивме во последните две сезони ни донесе сигурност во играта и самодоверба дека можеме да се надигруваме со кој било. Одлично се чувствуваме, задоволни сме од прикажаното и ќе се обидеме да продолжиме во исто темпо. Важно за мене е клупската форма да ја пренесам и на репрезентативните настапи, особено пред Европското првенство во јануари. Со Лино имавме два собири и мислам дека сме на вистинскиот пат.

Вардар имаше добар старт на сезоната во СЕХА и лигата на шампионите, каде ги браниме трофеите кои ги освоивме минатата натпреварувачка сезона. Карачиќ истакна дека цел на црено-црните е да го освојат првото место во најсилната група, со што би имале полесен пат до нов завршен турнир во Келн.

-Нашата желба е да ги одбраниме трофеите во сите натпреварувања. Сакаме да ја освоиме СЕХА лигата и така и се поставивме на стартот. Во Лигата на шампионите немавме среќа да ја победиме Барселона со повисока разлика, а имавме можност за тоа. Но, добро е и вака. По ЕХФ неделата ни следува гостување кај Кристијанштад, па два меча против Рајн Некар и гостување кај Барселона. Сакаме да ја обезбедиме првата позиција на табелата за да си го скратиме патот до Келн, каде сакаме да ја одбраниме титулата од минатата година.