Македонија ја победи Швајцарија и се пласира во 1/2 финалето на турнирот во Бугојно

Македонија ќе игра во полуфиналето на турнирот „Ракометот е мојата иднина“ кој се одржува во Бугојно. Нашата кадетска ракометна репрезентација го доби убедливо натпреварот против Швајцарија и на тој начин успеа да се пласира во најдобрите четири селекции на овој силен меѓународен турнир.

Уште од самиот старт на натпреварот Македонија наметна силно темпо на игра, додека Швајцарија првиот гол го постигна дури во 6.минута за да го намали резултатот на 3:1. На средина од првото полувреме имавме и позитива од пет гола, додека по истекот на првите 30 минути резултатот на семафорот гласепе 17:10.

Одлично игравме и во второто полувреме кога растеше само предноста во наша корист. Швајцарија немаше ниту сили да се надигрува со нас, ниту пак беше во можност да внесе резултатска неизвесност. На крајот убедлива победа за Македонија со резултат 33:22.

Од вардаровите играчи, Игор Ѓорѓиев и Мартин Карапалевски постигнаа по 3 гола, додека Ален Ќосевски беше стрелец на 2 погодока. За противник во полуфиналето ќе ја имаме селекцијата на Словенија.