Несреќен пораз за кадетите на РК Вардар во младинската лига, Радовиш со звукот на сирената постигна гол за победа

Кадетите на ракометниот клуб Вардар се несреќно поразени на гостувањето кај екипата на Радовиш, на натпревар од младинската лига. Со звукот на сирената, домашниот тим постигна гол и успеа да излезе како победник во дуелот со црвено-црните.

Во текот на првото полувреме видовме тврда и борбена игра на двете страни, се играше гол за гол и ниту една од екипите немаше поголема предност од еден гол, се до моментот кога при нерешени 6:6, вардарци успеаа со серија од 0:3 да поведат со највисоки три гола разлика (6:9). Последниот гол во првото полувреме го постигна домашниот тим, за да намали на 7:9, резултатот кој беше актуелен на полувреме.

На стартот на второто полувреме, Вардар ја врати позитивата од три гола разлика (7:10), но екипата на Радовиш постигна три последователни голови и го израмни резултатот на 10:10. До крајот на натпреварот се играше гол за гол, се до истекот на последните секунди беше неизвесен победникот на овој натпревар од младинската лига. Беше нерешено 18:18, кога екипата на Радовиш постигна гол речиси со звукот на сирената и успеа да ги освои бодовите од овој интересен натпревар.

Вардар: Стојкоски, Мишевски, Чакалиќ 4, Павловски 3, Трајановски 2, Атанасовски 2, Ангеловски, Петков, Грујовски 2, Трајчевски, Савревски 3, Пешевски, Димчевски 2, Мирчевски 1, Трифуновски, Пешевски.