Талески ги постигна првите голови на СП, но Македонија загуби од Словенија

Македонската ракометна репрезентација со пораз ја започна втората фаза на СП во Египет. Попладнево избраниците на Брестовац беа поразени во дуелот со Словенија, противникот славеше убедливо со резултат 21:31.

Македонија имаше сили да се надигрува само 20 минути, кога одржуваше резултатска неизвесност. Подобро го отворивме натпреварот кога поведовме со 5:3, откако Словенија го отвори резултатот, нашите играчи во два наврати имаа позитива од два гола, последен пат беше 6:4. Сепак противникот влезе во серија од три последователни погодоци и поведе со 6:7. Следеше период кога се играше гол за гол, се до резултат 9:9 кога со нова серија избраниците на Врањеш успеаа на полувреме да заминат со солидно водство од 9:13

Лошо го стартувавме второто полувреме, кога после само пет минути игра, Словенија имаше и највисоки 11:18. Македонија имаше еден добар период во својата игра, кога после неколку одбрани на Томовски успеавме да смалиме на пет гола разлика, но словенците повторно земаа замав и резултатски се одлепија.На крајот високо триумфираа со резултат 21:31.

Филип Талески ги постигна првите голови на мундијалот, левиот бек на Вардар имаше 3/4, додека Димитриоски и Стоилов запишаа по 1 гол. Во петок на програмата е натпреварот со Русија.