Стоилов најдобар спортист на Македонија, Гонзалес најдобар тренер, според изборот на АМС

Ракометниот клуб Вардар продолжува да ги собира наградите, за најдобри спортисти во 2017 година. Овој пат во изборот на Агенцијата за млади и спорт и Сојузот на спортски федерации признанијата завршија во рацете на Стојанче Стоилов и Раул Гонзалес.

Капитенот на црвено-црните, Стоилов е прогласен за најдобар спортист во Македонија за 2017 година, додека Раул Гонзалес очекувано е најдобриот тренер. Вардар ја имаше најуспешната година во својата историја, во која освои четири трофеи, од кои најголем беше оној од Лигата на Шампионите.

-Огромна чест и задоволство е да се биде најдобар во годината. Од спортскиот крем на Македонија сум избран за спортист на 2017 година. Пред мене многу подобри играчи ја освојувале и мене ми претставува задоволство што сум во тоа друштво. Ова е огромно лично задоволство, но ракомет не се игра сам. Сакам да им се заблагодарам на колегите од клубот и од репрезентацијата. Направивме голем успех со освојувањето на Лигата на шампионите. Оваа година беше трофејна со многу награди, а се надевам дека следната ќе биде уште подобра почнувајќи уште во јануари на Европското првенство во Хрватска каде верувам дека нема да разочараме, изјави Стоилов примање на наградата.