Vardar Fans
Ракометарите на Вардар се вратија на победите во домашната Супер Лига. Вечерва во С.Ц. Јане Сандански, избраниците на Веселин Вујовиќ убедливо ја победија екипата на ГРК Тиквеш со резултат 34:27.
Вардарци и со половина сили успеаа да стигнат до нов триумф во лигата и на тој начин да се вратат после непријатниот пораз од минатото коло против екипата на Еурофарм Пелистер 2. На стартот од натпреварот, екипата на Тиквеш даваше отпор и воспоставуваше некаква резултатска рамнотежа, но црвено-црните после истекот на првите 30 минути имаа предност од 18:13, а десет голови во овој период за Вардар постигна Тимур Дибиров.
Во вториот дел, Вујовиќ им даде шанса за игра и на младите ракометари, како Савревски, Карапалевски, Крстевски, Ќосевски, Мишевски и Атанасовски, но тука беа и поискусните ракометари. Имавме контрола на резултатот, стигнавме и до двоцифрена предност, за противникот во последните пет минути да ја намали негативата и да се избори за достоен пораз.
Најефикасен ка Вардар беше Дибиров со 11 голови, додека по 4 имаа Савревски и Кудуз.
