Победи за РК Преспа и РК Урдаревски во машка конкуренција, во рамките на Јуниор лигата

Во малата сала на спортскиот центар Јане Сандански продолжија натпреварите во ракометната Јуниор лига. Во машка конкуренција победи забележаа екипите на Преспа Вардар и РК Урдаревски.

На натпреварот помеѓу екипите на Преспа и Урдаревски во генерација родени 2002/03 година, подобра беше екипата на Преспа. Конечниот резултат на овој дуел гласеше 19:11. Тимот на РК Урдаревски го постигна првиот гол на овој меч, но врати тимот на Преспа со серија од пет погодоци за водство од 5:1. Оваа предност успеаа да ја одржат до првото полувреме, кога на краток одмор се замина со резултат 10:5.

Вториот дел започна со гол на Преспа за веќе убедливи 11:5. Сепак екипата на РК Урдаревски не се предаваше, па со подобра игра во продолжение успеа да го намали резултатот на 13:10. Но Преспа го направи завршниот удар, тие со нова серија од четири последователни голови направија највисоко водство на мечот од 18:10. До крајот по еден гол за двете екипи, за конечен резултат од 19:11.

Тимот на РК Урдаревски сепак успеа да забележи триумф во Јуниор лигата, но во генерација родени 2000/01 година. Совладана беше екипата на Академија 2, со резултат 13:10. Заслужен триумф за РК Урдаревски кој имаше контрола на резултатот и постојано водство во текот на целиот меч. Уште од стартот беше најавена победата откако поведоа со 5:0. Истата позитива ја имаа и на полувреме, кога резултатот гласеше 8:3.

Второто полувреме донесе мала неизвесност, откако екипата на Академија 2 успеаа да се доближи на само два гола негатива (11:9). Сепак со два погодоци во серија РК Урдаревски стави точка на овој меч, за конечни 13:10.