Vardar Fans
Денес на програмата се завршните натпревари на турнирот “Вардар, еден живот, една љубов, на која ги дознаваме победниците. Во машкиот дел кај генерацијата родени 2000/01 година првото место му припадна на РК Филип, додека бронзениот медал е за РК Гостивар.
Во големото финале се сретнаа екипите на РК Филип и РК Илинден. Првиот гол на натпреварот беше постигнат дури во петтата минута за почетна предност на Филип-Вардар. Во следниот период гледаме цврста игра на двете страни, со игра гол за гол. Ниеден од тимовите не успева да се одлепи на разлика поголема од еден гол. Посебен акцент се ставаше на одбраната, па затоа гледавме и мал број на голови. Сепак во последните пет минути од првиот дел, екипата од Прилеп успева да поведе со два гола разлика и на полувреме да замине со водство од 5:7. Финалниот меч се играше во две полувремиња по 20 минути.
Вториот дел му припадна на РК Филип, кој успева за седум минути игра да направи серија од 1:5 и да поведе со највисоки 6:12. Повторно на голот го имаа расположениот Брајан Петкоски кој фати неколку зицер удари на РК Илинден. Во следните пет минути се игра гол за гол, што овозможува на Филип-Вардар да ја одржува предноста. На четири минути пред крај, Филип има недостижни 9:16, по што беше познат победникот на овој натпревар. Конечниот резултат гласеше 11:17. Џулиано Христоски и Давид Алексоски постигнаа по 4 голови кај победниците.
Третото место е за екипата на РК Гостивар која во малото финале ја победи РК Урдаревски. Во првите десет минути игра, РК Урдаревски имаше водство од 3:5, но до крајот на првите 20 минути, избраниците на Селмани прават комплетен резултатски пресврт и на одмор заминуваат со предност од 9:7. Второто полувреме со гол го отвори Гостивар за водство од 10:7. Како одминуваше натпреварот, Гостивар се повеќе ја зголемуваше предноста и на пет минути пред крај имаше водство од 17:12. Последните три голови се дело на Урдаревски за ублажување на поразот и конечни 17:15. Бојан Давидоски е најефикасен кај победникот со 4 погодоци.
