Со оглед дека вонредната состојба поради пандемијата со корона вирусот е продолжена и за наредните 30 дена, на денешниот состанок, од ракометната федерација на Македонија излегоа со предлог, да се поништи сезоната во Супер лигата. Шампион нема да се прогласува, а нема да има ниту испаѓање, додека лигата од следната сезона ќе биде проширена со четири нови екипи, кои оваа сезона беа дел од првата лига, додека Вардар и Еурофарм Пелистер ќе се приклучат од самиот старт на натпреварувачката сезона 2020/21.
Во целост ви го пренесуваме соопштението од ракометната федерација на Македонија:
Во рамки на превентивните мерки и донесените уредби од страна на Владата, ракометните натпревари во сите категории во домашното првенство се во мирување. Воедно ве известуваме дека Ракометната федерација на Македонија е во секојдневна комуникација со надлежните институции со единствена цел за навремено информирање и спроведување на мерките за превенција од ковид-19 .
Земајќи ја во предвид прогласената вонредна состојба во државата како и продолжувањето на истата заклучно со 15 мај 2020 година, дополнително и самиот факт дека поголемиот број договори на ракометарите/ките со клубовите имаат валидност заклучно до 31 мај 2020 година како и насоките од Европската ракометна федерација за завршување на националниот систем на натпревари до 31 мај 2020 година, се наметнува заклучокот дека моменталната состојба не дозволува и не постојат реални услови за регуларно завршување на домашното првенството. За сезоната 2019/2020 година ќе биде доставен предлог до УО на РФМ да нема прогласување на победник во националниот систем на натпревари во сите конкуренции и категории, истиот предлог ќе биде доставен и за Куп на Македонија 2020 година. Местата во Европските клубски натпреварувања на ЕХФ и местата во регионалната СЕХА лига ќе бидат распределени согласно критериуми од страна на УО на РФМ.