Vardar Fans
РК Вардар ја запиша својата 15 победа во СЕХА лигата. Вечерва нашите играчи лесно и убедливо го совладаа тимот на Извиѓач со резултат 27-33 (12-17). Со оваа победа Вардар си го обезбеди првото место на табелата, односно добива најлесен противник на Ф-4 завршниот турнир.
Првите десет минути од мечот му припаднаа на домаќинот кој водеше со резултат 5-4. Вардарци како одминуваше првото полувреме, така си ја зголемуваа својата предност и влегуваа во ритам. Па така во 16 минута од мечот нашиот тим имаше предност од највисоки плус четири 6-10. Во следниот напад преку Карачиќ “црвено – црните” зголемија и на плус пет, ова беше знак тренерот на Извиѓач да побара минута одмор. Потоа во 23 минута од натпреварот Вардар имаше предност од 11-15. Во првите 25 минути од мечот Кањељас беше најрасположен играч со пет постигнати погодоци. Шпанскиот двоец Македа – Кањељас во првиот дел постигна вкупно десет погодоци. На полувреме Вардар замина со пет голови предност 12-17.
Второто полувреме Извиѓач го отвори подобро. Успеа за седум минути да намали неколку голови од разликата на Вардар и да дојде на три негатива. По оваа серија на домаќинот тренерот на Вардар, Гонзалес побара минута одмор. Добрата игра во вториот дел на Извиѓач продолжи, во 39 минута овој тим дојде на само минус два. Потоа следуваше серија од три погодоци на нашиот тим преку Карачиќ и Недановски за сигурни плус пет во 42 минута. Се беше јасно веќе во 50 минута од мечот кога Вардар имаше веќе предност од седум разлика. Во вториот дел Милиќ на голот на Вардар за нешто помалку од 20 минути успеа да одбрани десет топки. Се до крајот на мечот вардарци рутински си ја доработија својата задача.
Во редовите на Вардар најпрецизен играч беше Карачиќ кој постигна осум погодоци, Кањељас го следеше со седум.
