Vardar Fans
Голема победа за македонската ракометна репрезентација на отварање на Европското првенство. Со гол во последните секунди на Кирил Лазаров, Македонија славеше минимално во дуелот со Украина (26:25).
Избраниците на Брестовац имаа предност во најголем дел од натпреварот, но во последната минута од дуелот, противникот успеа да го израмни резултатот. Во еден дел од првото полувреме имавме и највисоки четири голови разлика (10:6), но и дозволивме на Украина да се врати во игра и да намали на само еден гол негатива (10:9). Сепак до крајот на првото полувреме, Македонија се погрижи да има позитива од три гола (13:10), благодарение на одличниот голман, Никола Митревски кој беше еден од најзаслужните за оваа победа.
Добро игравме и во второто полувреме, кога стигнавме и до најголема предност од пет гола (21:16). Украина не се предаде, направи серија од четири последователни погодоци и намали на 21:20. Македонија повторно се одлепи на три гола, но избраниците на Бебешко го внесоа мечот во голема неизвесност, откако израмнија на 25:25. Во последниот напад, најпрво Стоилов изнуди исклучување за противнички играч, со што во последните секунди се создаде можност, Лазаров да има простор да бие, нашиот капитен погоди за 26:25 и за прва победа на ЕП.
Дефинитивно, јунак беше Митревски кој мечот го заврши со 15 одбрани. Лазаров беше најефикасен со 8 голови, додека Стоилов имаше 4 погодоци.
