Вардар е единствениот тим, кој после девет одиграни кола во ЛШ, се уште нема пораз

Европскиот ракометен шампион успеа да освои бод на тешкото гостување во Манхајм, против шампионот на најсилната бундес лига, а тоа е екипата на Рајн-Некар. После одигрување на девет кола во двете најсилни групи А и Б и во двете послаби Ц и Д, Вардар е единствениот тим кој се уште е без пораз во најголемото натпреварување. Тој епитет пред ова коло го држеше и екипата на Монпелје од Франција, која загуби во ова коло на домашен терен од Бешикташ и го доживеа првиот пораз.

Вардар заедно со ПСЖ и Монпелје имаат освоено најмногу бодови, после девет одиграни кола, или вкупно 16 за сите екипи, но црвено-црните можат да се пофалат дека се уште немаат капитулирано пред ниту еден противник. Вардар е најдобар и по уште еден статистички податок и многу важен во ракометната игра, а тоа е одбраната. Избраниците на Гонзалес ја играат најдобрата одбрана и примија најмалку голови до овој момент, или само 209, а како споредба другите две екипи кои се веднаш после нас, се Кил и Скјерн, кои примија идентични 232.

Последниот меч за оваа година, го играме во сабота и тоа на домашен терен против екипата на Кристијанштад. Вардар е голем фаворит на овој дуел и се очекува со триумф да ја заврши најуспешната година во историјата на клубот.