Вардар ја има најдобрата одбрана, во најсилните групи од Лигата на Шампионите

Вардар игра одлично на старот од новата сезона во Лигата на Шампионите, каде после четири одиграни кола има исто толку победи со што се наоѓа на првото место на табелата. Избраниците на Парондо забележаа по две победи на гостински и домашен терен. Во Скопје ги совладавме екипите на Кристијанштад и Рајн-Некар, додека на гости бевме подобри од тимовите на Монпелје и Веспрем.

Освен што имаме максимален број на освоени бодови во најсилните групи, заедно со екипите на ПСЖ и Пик Сегед, можеме да се пофалиме и со податокот дека примивме најмалку голови во првите четири кола. Одбраната е клучот за победата, а токму црвено-црните го имаат најсилното “оружје„. Примивме 101 гол што е најмалку од екипите во двете најсилни групи, а најблиску до нас се токму екипите кои се уште немаат пораз до овој период. Тоа се ПСЖ на Раул Гонзалез кој има примено 105 гола и Пик Сегед со примени 106 голови.

Во следното коло, Вардар го очекува нов тежок натпревар, гостување во Киелце, дуел закажан за 14-ти октомври со почеток од 17:00 часот.