Vardar Fans
Денес во спортскиот рекреативен центар Кале се одигра младинското ракометно дерби помеѓу екипите на РК Вардар и Еурофарм Работник. Далеку поуспешна беше екипата на Вардар, која славеше со двоцифрена разлика од 32:22.
Првите два гола на натпреварот по еден на двете страни беа од ударите од седум метри, а за нас прецизен беше Ален Ќосевски. Следните два гола на натпреварот беа дело на нашиот бек, Васе Наков кој му носи предност на Вардар од 3:1. До крајот на првото полувреме црвено-црните имаа постојно водство. За момент гостинската екипа го намали резултатот на 3:2, но црвено-црните вратија со серија од четири последователни голови, за највисоката предност од пет голови разлика (7:2) во 10 минута од натпреварот. Најзаслужни за ова почетно солидно водство беа Бикоски, Ќосевски и Мисаилески кои ја погодуваа противничката мрежа.
Противникот не му дозволи на Вардар уште на стартот да се одлепи на поголема разлика , па со два гола во серија намали на 7:4. Сепак на сцената стапаува нашето десно крило, Ален Ќосевски кој погодува три пати во серија од својата позиција и му носи предност на Вардар од највисоки шест гола, или резултат од 10:4 во 16 минута од мечот. Во следните шест минути, екипата на Работник успева да направи серија од 2:6 и во 22 минута да намали на само два гола негатива (12:10:0. Тоа беше знак за нашиот тренерски тандем, Чивлачки-Грчевски да повика минута одмор. До крајот на првиот дел се играше гол за гол на двете страни, но сепак нашиот состав заминува на полувреме со предност од 15:12.
Вториот дел започна со гол на Вардар и тоа за Мисаилески за резултат 16:12. Црвено-црните благодарение на неколку сврзани одбрани на Марко Кизиќ успеваат во 38 минута да поведат со највисоки седум голови (20:13) и и тоа со голот на бекот, Тони Атанасовски. Претходно од крило погоди и Христи Бикоски. Продолжуваме да го полниме голот на гостите, а денес Ќосевски е дефинитивно непогрешлив и со негов нов гол веќе водиме со високи 21:13. Протвникот ја прекинува лоша серија и постигнува гол после седум минути игра и тоа со два сврзани погодоци за намалување на 21:15. Но ние го имаме расположениот Ќосевски кој продолжува немилосрдно да ја полни мрежата на Работник, за резултат 22:15. Работник нема одговор за нашата игра, нова одбрана на Кизиќ кој им овозможува на своите соиграчи да зголемат на 24:15. На осум минути пред крајот имавме и двоцифрена предност од 26:16, по што беше јасно кој ќе ги освои бодовите на овој натпревар. Два гола постигна и нововлезениот Александар Нанов, додека на голот шанса доби и Александар Тушев кој забележа три одбрани. Последните пет минути беа рутина за Вардарци кои славеа со резулат 32:22.
Најефикасни во нашиот состав беа Ален Ќосевски со 8 и Антониј Мисаилески со 5 голови.
РК Вардар: Ќосевски 8, Динев 2, Антевски, Миланов, Милошески 4, Тушев, Атанасовски 2, Биковски 1, Кизиќ, Олтовски 1, Нанов 3, Николов 1, Стојановски, Мисаилевски 5, Мајсторовски 2, Наков 3.
