Скубе: Дојдов во голем и сериозен тим

Репрезентативецот на Словенија, Стас Скубе е еден од новите играчи кои летово го засилија тимот на Вардар. Средениот бек доаѓа од екипата на Пик Сегед, а во својата играчка кариера има настапувано и за Горење Велење и за Тримо Требње. Скубе очекува добра сезона во црвено-црниот дрес, со повторување на успесите од претходните сезони.

-Пресреќен сум што сум во Скопје. Дојдов во голем и сериозен тим, се надевам дека ќе играме како минатата година. Иако многу играчи си заминаа од Вардар, но верувам дека ќе имаме силна екипа. Можеби е најдобро вака кога никој не очекува дека Вардар ќе биде добар како минатата година. Јас сум отпимист и како што кажав, верувам дека ќе бидеме добри.

Скубе го замени Циндриќ, кој се пресели во екипата на Киелце. И словенецот е свесен дека ќе има тешка задача да го замени играчот од кој многу работ зависеа во Вардар.

-Сите знаеме кој е Лука Циндриќ и како играше, според мене е најдобар среден бек, ќе биде тешко да го заменам, но тука е и Карачиќ, заедно ќе го водиме Вардар во една успешна приказна, истакна Скубе.