Пет играчи од РК Вардар имаа придонес во освоеното четврто место на кадетската репрезентација

Кадетската ракометна репрезентација го освои четвртото место на ЕХФ Шампионатот во Грузија. Македонија одигра вкупно седум натпревари на шампионатот и оствари пет победи и два порази. Во групата го освоивме првото место со пет победи од исто толку мечеви, а поразите дојдоа во завршниот дел. Во полуфиналето бевме поразени од Белорусија, додека во малото финале, подобра од нас беше селекцијата на Швајцарија.

Дел од националната селекција на овој шампионат беа и пет играчи од Вардар, кои имаа свој придонес во конечниот пласман. Како најдобар стрелец се покажа Игор Ѓорѓиев кој постигна вкупно 15 голови. Мартин Карапалевски беше стрелец на 5 голови, додека Ален Ќосевски постигна 2 гола. Кристијан Анѓелковски играше претежно во одбраната, додека на голот и на овој шампионат супериорен беше Марко Кизиќ. Сите споменати играчи во новата сезона ќе настапуват за екипата на Вардар јуниор, која се натпреварува во супер лигата.