Vardar Fans
Вардар Јуниор во малата сала на С.Ц. Јане Сандански одигра натпревар во рамките на 8.коло од плеј-аутот во Супер лигата. Противник ни беше тимот на Струга од кој бевме поразени со резултат 28:30.
И двете екипи погодија во својот втор напад, а откако Струга го отвори резултатот, кај Вардар Јуниор со два погодоци врати Стефан Крстевски за наша предност од 2:1. Следеше период кога се играше гол за гол и во неколку наврати резултатот беше израмнет, така беше при резултат 2:2, 3:3, па 4:4 и 5:5. Гостинската екипа за прв пат на овој меч сврза два гола, па во 13 минута се стекна со водство од 5:7, а Игор Ѓорѓиев од пенал успева да намали на 6:7. Откако се одбранивме во следниот напад не успеваме да постигнеме гол од зицер позиција, а тоа го казнува Струга која постигна два гола во серија, од кои еден на празен гол, со што поведоа со највисоки три гола позитива (6:9). Пикерот на Вардар Јуниор, Стефан Атанасовски ја прекина лошата серија, постигна гол за намалување на 7:9, но упорната Струга во 23 минута имаше и четири гола позитива (7:11). Во овој период се разбрани голманот на Струга, а црвено-црните имаа промашено неколку напади, што беше и причина за одлепувањето на гостинскиот тим. Откако Ќосевски не успеа да погоди нов зицер удар за младите вардарци, на нашиот гол иста акција брани и Јоаким Анѓеловски, додека Дејан Кукуловски со гол намали на 8:11. Врати Струга на нашиот гол, а можеше лесно да стигне и на плус пет гола, но со интервенција одново се истакнува Анѓеловски. Сепак Струга не греши во следниот обид, кога ја погоди празната мрежа на Јуниор, за највисоки 8:13 на две минути пред крајот на мечот. Во финишот успеавме да ја намалиме негатива и тоа со двата гола на Кукуловски, за на полувреме да се замине со достижни 10:13 за екипата на Струга.
Ален Ќосевски беше играчот кој успеа да постигне прв гол во вториот дел и да намали на 11:13, но Струга прави мини серија од 0:2 и има предност од 11:15. Избраниците на Стојан Петрушевски влегоа во серија од 3:0, а имаа можност и да дојдат до израмнување, но противничкиот голман пресече една наша топка во контра-напад, а Струга дојде на два гола позитива. Никола Цветаноски е играчот кој постигна гол и намали на 16:17 во 36 минута од натпреварот. Во следните седум минути од мечот се играше гол за гол, а Струга не ја даваше предноста, додека Вардар Јуниор се обидуваше да израмни. Тоа им успева на вардарци, кога со голот на Игор Ѓорѓиев во 45 минута израмнивме на 21:21. Имавме можност и за предност, откако Анѓелвски одбрани, а Кукуловски не успеа да го погоди празниот гол на Струга. Противникот повторно отиде на два гола позитива (22:24), но Ќосевски го враќа Јуниор во игра откако намали на еден гол негатива во 49 минута од натпреварот, додека со одличниот погодок на Карапалевски израмнивме на 24:24. Одлично играа момците на Стојан Петрушевски, нов одбранет напад и нов гол на Кукуловски, со што имаме водство од 25:24, тоа значеше и серија од 3:0 за црвено-црните. Струга имаше напад за плус два , не успева, затоа во контра напад погоди Крстевски за израмнување на 27:27. Андреј Петковски не дозволи Струга да се одлепи на два гола предност, откако одбрани седмерец на противнички играч, па Вардар Јуниор и понатаму беше во игра за бодови. Сепак победата е за екипата на Струга, која слави победа со резултат 28:30.
Дејан Кукуловски и Стефан Крстевски беа најефиксни кај Вардар Јуниор, и двајцата постигнаа по 6 голови.
