Пионерките на Вардар се закитија со златниот медал, пионерите го освоија второто место на „Светосавскиот“ турнир

Вечерва финишираше третото издание на “Светосавскиот“ ракометен турнир во Крагуевац. На истиот настапија машката и женска пионерска екипа на Вардар. Девојките успеаа да освојат прво место и златен медал, додека машките го освоија второто место.

Пионерките на Вардар предводени од Платон и Папуџиева успеаа да го добијат натпреварот против екипата на Медицинар и на тој начин да го освојат првото место на турнирот. Во текот на целиот натпревар вардарки беа во постојана предност и на крајот заслужено успеаа да го освојат трофејот. Во најголем дел од првото полувреме имавме водство, кое се движеше од 1-3 гола разлика, иако Медицинар не дозволуваше осетно да се одлепиме. Така на полувреме имавме само два гола позитива (10:12).

Во второто полувреме игравме многу подобро во одбраната, која беше клучна за да ја зголемиме предноста. Со серија од неколку погодоци се одлепивме најпрво на пет гола позитива, а потоа се беше полесно. На крајот стигнавме и до висока победа, изразена со резултат 16:25.

Најефикасни во нашите редови беа Бојана Коцева и Сара Стефаноска кои постигнаа по 4 голови. Мила Пешиќ и Борјана Коцева имаа по 3 погодоци. Зорица Андовска, Александра Коловска, Наталија Максимовска и Бојана Радевска имаа по 2 гола.

Пионерите загубија во дуелот кој одлучуваше за тоа кој ќе го освои трофејот. Во решавачкиот меч бевме поразени од екипата на Металопластика.

На првиот гол се чекаше пет минути, а истиот го постигна Трајановски во редовите на Вардар за отварање на резултатот. Следеше и прв гол за противникот за израмнување, но Вардар преку Петковски и повторно Трајановски поведе и со 1:3. Во следните минути стигна и ново израмнување (4:4), додека нашите пионери направија серија од 0:3 и поведоа со највисоки 4:7. Сепак до крајот на првите 20 минути, тимот на Металопластика успеа да намали на само еден гол (7:8).

Вардар беше во предност од три гола разлика и во 24 минута (8:11), но српската екипа врати со четири голови во серија и поведе со 12:11. За момент го израмнивме резултатот на 12:12, но Металопластика поведе и со 14:12. Се беше јасно, кога противникот се одлепи и на водство од 18:14, додека конечниот резултат гласеше 19:15.

Христијан Петковски и Матеј Трајановски постигнаа по 4 голови, додека Давид Младеновски и Андреј Петрушевски имаа по 3 погодоци. Еден гол имаше и Петар Стојановски.