Ѓоргоски, Ѓорѓиевски, Тасевски, Живков и Шабани дебитираа на официјален натпревар за сениорскиот тим

Фудбалскиот клуб Вардар ја стартуваше новата натпреварувачка сезона, за прв пат во историјата клубот ќе се натпреварува во Втората Лига-Запад.

Со оглед дека не бевме во можност на време да ги регистрираме новите засилувања, на вчерашниот натпревар од првото коло против екипата на Кораб, во составот доминираа играчи од младинската школа, како и оние поискусните кои останаа во Вардар, но нив ги имаше во многу мал број.

На натпреварот со Кораб, своето деби во сениорскиот тим, на официјални натпревари го имаа неколку играчи од младинскиот погон. Се работи за Филип Ѓоргоски (2003), кој претходно имаше настап за сениорскиот тим, но на пријателски натпревар против екипата на Македонија Ѓ.П. Деби во црвено-црниот дрес запишаа и Филип Ѓорѓиевски (2003), и Енес Шабани (2002), сите споменати беа стартери на гостувањето во Дебар.

Од клупата во второто полувреме шанса добија и Петре Тасевски (2003) и Славче Живков (2003), за кои ова беше исто така деби натпревар во првиот тим на Вардар. Во стартниот состав беа и Иван Мицевски (2002), Грегори Давков (2003), Лео Андрески (2003) и Антонио Мирков (2003), но тие минатата сезона дебитираа на официјални натпревари во ПМФЛ.