Вардар со висока победа против Тетекс во подготвителниот период

Екипата на ФК Вардар стартуваше со победа на првиот контролен натпревар, како дел од подготовките за пролетниот дел од сезоната во ВМФЛ.

Денес на теренот во Кадино, избраниците на Бобан Грнчаров, славеа убедливо со резултат 5:0 на натпреварот со екипата на Тетекс. Иако со тренинзи стартувавме пред пет дена, вардарци денес одлично делуваа на теренот и стигнаа до висок триумф против “братскиот“ тим на Тетекс. Сите голови беа дело на новите играчи, по два постигнаа Дарко Размоски и Дејан Цветаноски, додека еден беше дело на Роберт Митев.

На овој натпревар, Грнчаров настапи со две различни постави, давајќи шанса на голем дел од играчите кои денес беа на располагање.

Стартен состав: Филип Гачевски, Јорго Папули, Ненад Мишковски, Марко Стојилевски, Давид Велковски, Дарко Мицевски, Кристијан Николовски, Горјан Цветков, Дарко Размоски, Дарио Десниќ и Марко Николовски.