Вардар повторно “кобен“ за Целје, црвено-црните продолжуваат со победи во ЛШ

Нашиот ракометен шампион запиша нови бодови во најголемото ракометно натпреварување забележувајќи ја третта победа во лигата на шампиони. Совладана беше екипата на Целје Пивоварна Лашко со резултат 26:32.

Лошо започна натпреварот за Вардарци, кои по пет минути играа имаа негатива од 3:0. Конечно погодуваме преку капитенот Стоилов, кој го “скршува“ мразот. Штербик ја забележува првата одбрана, а црвено-црните полека го фаќаат потребниот ритам и во 11 минута со голот на Карачиќ го израмнуваме резултатот. Стоилов ги одигра сите 30 минути на својата позиција и за кратко време го постигнува својот втор гол. Истовремено Штербик стигнува до својата третта одбрана. Абутовиќ искористува една позиција во нападот и се запишува во листата на стрелци, за прво наше водство од 6:7. Крилото Чупиќ полека влегува во посакуваната форма и зголемува на 6:8. Наместо да поведеме со три гола разлика, домаќинот во два напади успева да постигне гол и да намали на 8:9. Целје успева да ја врати играта од почетокот и со неколку сврзани погодоци, најпрво да израмни а потоа и да поведе со 12:11. До крајот на првото полувреме се играше гол за гол на двете страни, па на одмор се заминува со нерешен резултат од 15:15.

Вториот дел започнува со одличен гол на Шишкарев за предност од 15:16. Дибиров успева да пресече една топка на противникот и од тешка позиција да погоди за 16:18. Со два последователни голови на Шишкарев црвено-црните имаат највисоки три гола разлика во тие моменти 18:21. Марсениќ во второто полувреме го заменува Стоилов, сврзува два погодоци за веќе предност од 19:23. Одлично играме во овој период, одбраната функционираше на потребното ниво и не дозволувавме на Целје да постигне лесни голови. Одличниот Дибиров погодува за веќе најголеми шест голови разлика 19:25 во 48 минута од мечот. Неколку наши грешки му овозможуваат на Целје да ја преполови нашата предност и да намали на три гола негатива на десет минути пред крајот. Дибиров со својот петти погодок ја прекинува серијата на домаќинот и зголемува на 22:26. Целје за момент намалува на само два гола разлика, но Марсениќ и Кањелас не дозволуваат неизвесна завршница и се одлепуваат повторно на четири гола предност на неколку минути пред крајот. Штербик стигнува до својата десетта одбрана, што му овозможува на Шишкарев да стави крај на мечот. Конечниот резултат е 26:32 во корист на Вардар.

Следен меч за Вардар во лигата на шампиони е домашниот натпревар против Пик Сегед. Пред тоа во среда играме против екипата на Извиѓач во сеха-лигата.