Голем пораз на ЖРК Вардар СЦЈС на првиот осминафинален меч во Челинџ купот

Екипата на ЖРК Вардар СЦЈС е убедливо поразена на првиот осминафинален меч во Челинџ купот. Избраничките на Симе Симовски се враќаат во Скопје со 13 гола негатива, откако го загубија натпреварот против Хорс со резултат 26:13.

По два неискористени напади на двете екипи, домашниот тим на Хорс прв го отвара резултатот за водство од 1:0. За напомена Драгана Петковска ги скроти двата удари на противникот. Младите Вардарки имаа можност да го израмнат резултатот, но неприцизна во ударот од седум метри беше крилото Наташа Нолевска. Во следните минути екипата од Шведска успева да зголеми и на 3:0, додека првиот гол Вардар СЦЈС го постигнува дури во 11 минута, дело на Теодора Керамитчиева. Во претходните напади немавме среќа да го погодиме голот, иако и домашниот голман имаше неколку добри интервенции. Хорс постигнува два нови гола и зголемува на 5:1. Вториот гол за Вардарки повторно го постигнува Керамитчиева, а во следните три минути правиме серија и намалуваме на 5:4 во 18 минута од натпреварот. Петковска беше одлична на голот во тие моменти. При резултат 6:5 тренерот на Хорс повикува тајмаут и тој момент следи голем пад во нашата игра, односно избраничките на Симовски не успеваат до крајот на првиот дел да го пронајдат патот кон мрежата на противникот. Напротив домаќинот со серија од 7:0 по истекот на првите 30 минути на одмор оди со убедлива предност од 12:5. Неубедливо издание за нашите девојки во овој дел од мечот, каде неискористивме и неколку обиди од левата крилна позиција.

Серијата продолжи и во второто полувреме кога по само четири минути игра, Хорс стигна и до двоцифрена предност од 15:5. Ние првиот гол после голем пауза го постигнуваме во 38 минута преку Симона Стојановска за намалување на 17:6. Следи уште еден нејзин погодок за резултат 17:7. Два погодоци врза Вардар по тајмаутот кој го побара Симовски. Сепак домашниот тим враќа со серија од три последователни голови за зголемување на највисоки 20:7. Оваа разлика противникот ја одржуваше до самиот крај, за конечен резултат од 26:13.

Вардарки ќе имаат тешка задача на реваншот во Скопје да ја анулираат оваа негатива за пласман во следната рунда.