Нема одмор за Вардарци, денес нов натпревар против Горење, кој е прв пред домашната публика во новата сезона

Нема одмор за екипата на РК Вардар која денес игра нов натпревар во рамките на СЕХА-лигата и тоа прв на домашен терен во новата сезона против екипата на Горење Велење. Двете екипи го одиграа првото коло, во кое Вардар го победи Металург (23:32), додека Горење на домашен терен беше поразен во дербито од својот најголем ривал во домашното првенство, тимот на Целје Пивоварна Лашко (22:25).

Ова ќе биде само втора сезона за вицешампионот на Словенија во ова натпреварување, додека Вардар ја игра веќе седмата последователна сезона во СЕХА-лигата, во која е најтрофејниот клуб со три освоени трофеи пред екипата на Веспрем која има два. Минатата сезона на двата одиграни натпревари против Горење славевме, во истава сала каде утре се игра мечот (40:32), додека на гостувањето победивме минимално (29:31).

Што се однесува до промените во составот на Горење од минатата сезона, има неколку рокади во екипата. Нов тренер е поранешниот селектор на Хрватската репрезентација, како и тренер на Брест Мешков, се работи за хрватот Жељко Бабиќ. Тимот го напуштија Лука Митровиќ, кој премина во најголемиот ривал, тимот на Целје, потоа естонецот, Андрис Целминс, како и домашните играчи, Јанез Гамс и Кенан Пајт. Најголемото засилување кое пристигна во Горење оваа сезона е средниот бек Жарко Пејовиќ кој пристигна од екипата на Данкерк од француското првенство, кој е и поранешен играч на Вардар, потоа Јан Гребенц кој дојде од Рибница, како и Вердинек Матиќ кој пристигна од Марибор. Токму новите засилувања, заедно со Брумен беа најефикасни на воведниот натпревар против Целје.

Вардар важи за фаворит на овој натпревар без оглед што во екипата ќе недостасуваат Фереира, Циндриќ и Недановски, сепак квалитетот и домашниот терен се на наша страна. Овие мечеви се добра подготовка за воигрување на тимот пред предизвиците кои претстојат во лигата на на шампионите и првиот меч на гостински терен против тимот на Висла Плок. Се надеваме на полна сала против Горење, билетите се по цена од 50 денари, доволен мотив и поттик за Вардаровите навивачи да го проследат денешниот натпревар, како и за сите оние кои имаат сезонски билет и Вардар ПАС картичка.