Vardar Fans
Во недела, нашиот фудбалски шампион ќе одигра ново коло во ПМФЛ, каде за противник го има тимот на Шкупи. За само неколку дена повторно ќе се сретнеме со истиов противник, откако вчера во рамките на првиот меч од осминафиналето на купот одигравме со нерешен резултат 1:1. Во пресрет на првенствениот меч, Тодор Тодоровски очекува три бода за Вардар.
-Многу рано примивме гол и после тој гол сè беше под наша контрола. Направивме многу шанси, имавме иницијатива, го постигнавме посакуваниот погодок, но сметам дека требаше да дадеме уште повеќе, односно да постигнеме уште некој гол и да победиме. Меѓутоа не успеавме, но ни престои реванш во кој што ќе мораме да одиме на гол и на победа за да поминеме во следната фаза. Знаеме дека Чаир е секогаш тешко гостување за секоја екипа, теренот, публиката и целокупниот амбиент си го прави своето, но ние сме Вардар и секогаш и секаде мораме да имаме желба за победа, да го дадеме максимумот и да ги освоиме трите бода.
Десниот бек на Вардар напомена дека неговиот тим мора да одигра многу подобро, доколку сака победа на неделниот натпревар.
-Сигурно дека треба да дадеме многу повеќе од оној натпревар во Ѓорче Петров, и да дадеме гол повеќе од противникот ако сакаме да го добиеме овој меч. Реков дека рано примивме гол кој не требаше да го дозволиме, и сега се надевам дека ќе успееме да ја сочуваме мрежата, а во нападот ќе постигнеме некој гол и на крајот ќе се радуваме на триумф.
