Vardar Fans
Денес на академијата се одигра натпревар од меѓурегионалната лига, за генерации родени “2002“ година, помеѓу екипите на Вардар и Форца. Истиот им припадна на црвено-црните со резултат 4:0.
Тренерот Петар Ѓорѓиевски го стартуваше мечот со следниве 11-сетмина: Станковски, Пешовски (c), Асенов, Ѓорѓиевски, Симев, Шабани, Вржалковски, Стојанов, Гугуљанов, Исени, Димитров.
Вардарци на овој меч имаа целосна контрола на играта и заслужено им припаднаа трите бода од овој меч. Андреј Стојанов и Ринор Исени беа првите кои имаа шанса да го отворат резултатот, но нивните удари завршија во пречката од голот на Форца, по што резултатот остана уште оној почетниот. Сепак набрзо успеваме да го отвориме резултатот и да поведеме со 1:0, со голот на Ринор Исени. Имавме можност од скратен корнер да го зголемиме водството, но Вржалковски биеше силно над голот на Форца. Вардарци имаа целосна доминација и посед на топка. Дарко Димитров беше новиот играч од нашите редови кој се закани, но неговиот удар со глава заврши над противничкиот гол. Конечно и екипата на Форца се закани од слободен удар, но топката одеше далеку од голот на Станковски. До крајот на првиот дел немаше некоја посериозна прилика кон двата гола, па на одмор се замина со минимално водство на црвено-црните од 1:0.
Во првите пет минути од второто полувреме успеваме да го зголемиме водството на 2:0, со голот на Дарко Димитров. Измена во второто полувреме на местото на Филип Симев, во игра влегува Бојан Илиев. Нова измена на местото на Гугуљанов, во игра е Веловски. Играта ја напушти Вржалковски, на негово место влезе Величковиќ. Продолжуваат измените во нашиот состав, излезе Исени,а на негово место е Петејчук.
Во следните минути немавме некоја поголема шанса, но паметно ја контролиравме играта по средината на теренот. Нови две измени прави тренерот Петар Ѓорѓиевски. Влегоа Фазлиу и Салиу, на местото на Димитров и Стојанов. Форца имаше голема шанса да го намали резултатот, но за малку топката завршува покрај нашиот гол.Нововлезениот Атом Фазлиу со првиот допир со топката успева да ја претвори во гол и да донесе предност на Вардарци од 3:0. Повторно Фазлиу успева да погоди и да го зголеми резултатот на 4:0. Во продолжение од дуелот одлична одбрана на Станковски, кој спречува почесен гол за Форца. До крајот немаше промени и натпреварот заврши со резултат 4:0.
