Vardar Fans
Сите три генерации на ФК Вардар се пласираа во големото финале на турнирот “Кул Куп 2018„. Тоа се генерациите родени “2007„ “2008„ и “2009„ година кои ги добија полуфиналните натпревари и од 16:30 часот ќе се борат за првото место на турнирот.
Генерацијата “2007„ немаше поголеми проблеми во полуфиналниот дуел против Нова Колонија, кој го доби убедливо со резултат од 6:0. Голеадата ја отвори Стефан Младеновски, откако претходно асистираше Поповски, за водство од 1:0. Избраниците на Чунга Лунга беа далеку подобриот тим на теренот, а противникот немаше сили да се надигрува со нашиот состав.
Вториот гол беше на најмладиот Александар Грашески кој постигна гол за 2:0, на асистенција од Младеновски. Во листата на стрелци се запишува и новото засилување кое пристигна од Фамос, се работи за Мичо Поповски, гол со кој зголемивме на 3:0. Можевме да зголемиме веднаш, но Марко Киш ја погоди стативата, а Колонија се закани од прекин, но одбрани Јаневски.
Втор гол на мечот постигна и Младеновски, со кој го означи крајот на првото полувреме, во кое Вардар имаше висока предност од 4:0. Во вториот дел ги чувавме силите за големото финале, но и покрај тоа постигнавме два нови гола. Уште едно засилување кое дојде од Фамос се запиша во листата на стрелци, тоа е Филип Смиљков кој зголеми на 5:0 и тоа со прекрасен гол од слободен удар. До крајот на натпреварот втор гол и за Мичо Поповски, за конечни 6:0. Во големото финале ќе играме со екипата на Кул.
Генерацијата “2008„ помина уште една пречка до големото финале, овој пат избраниците на Крстев убедливо ја поразија екипата на Ујпешт од Унгарија. Резултатот конечен на овој натпревар беше 6:2. Арти Азизи беше играчот кој успеа да постигне прв гол и да го отвори резултатот за 1:0, но само по две минути противникот успеа да врати и да израмни на 1:1. Имавме добра прилика да го вратиме водството, кога Азизи нафрли до Бранковски, овој на прва ја удри топката која оди покрај голот. Сепак Вардар ја врати предноста преку капитенот Дамјаноски кој со лоб удар постигна убав гол и донесе 2:1 за црвено-црните. До крајот на првиот дел видовме уште многу голови.
Стоперот на Вардар, Матео Кесиќ знае често да се уфрла во противничката половина, така беше и овој пат кога постигна гол, за зголемена предност од 3:1. Не се чекаше многу на нов гол, кога на асистенција од Киш, повторно погоди Ненад Дамјаноски, за 4:1.По уште еден гол на двете страни до крајот на првиот дел. Најпрво Ујпешт намали на 4:2, за Вардар да ја врати предноста од три гола, преку Коста Бошковски за 5:2, откако повторно асистира Матеј Киш.
Во вториот дел се играпе цврсто, а екипите веќе беа заморни од напорниот турнир, но Вардар благодарение на високото водство од првиот дел, успеа да стигне до победа. Имаше Ујпешт неколку обиди кои Грчевски без проблем ги одбрани, а Стефан Марковски се погрижи за поубедлива победа и конечни 6:2 во ова полуфинале.
Генерацијата “2009„ на Зоран Петковски уште еднаш себеси се надмина и направи нов подвиг со победата во полуфиналето против силната екипа на Форца. Пенал рулетот го реши победникот, а во него како подобар, посконцентриран и посреќен се покажа Вардар. Во регуларниот дел резултатот беше 1:1.
Најпрво Форца го отвори резултатот за 0:1, за црвено-црните после неколку шанси да вратат со погодокот на Марко Петровски. Тој резултат беше актуелен и на полувреме, а во второто полувреме останаа мирни мрежите на двете екипи. Гледавме навистина голема борба и двете екипи имаа прилики пред време да го решат патникот во финалето, но не се случи такво нешто.
Во пенал серијата триумф на Вардар од 6:5. Во првата и шесттата серија и двете екипи промашија, додека во осмата серија најпрво Вардар погоди а Форца промаши и тоа значеше крај на ова полуфинале. Голема радост за Вардар, кој во финалето го чека тимот на Омладинац, единствениот тим кој успеа да не победи на турнирот. Во финалето се надеваме на поинаков исход.
